ត្បូងឃ្មុំ) ៖ ដោយមានការយកចិត្តទុកដាក់ ពីសំណាក់ឯកឧត្តម ប៉ែន កុសល្យ អភិបាល នៃគណអភិបាលខេត្តត្បូងឃ្មុំ អណ្តូងទឹកចំនួន ១២ ដែលក្នុងនោះអណ្តូង ២ ប្រើម៉ូទ័របូមដោយប្រព័ន្ធសូឡា បានផ្តល់ជូនប្រជាកសិកររវាង ៣ភូមិ ក្នុងមូលដ្ឋានឃុំកក់ ស្រុកពញាក្រែក អាចជួយសង្គ្រោះស្រូវ ដែលប្រឈមខ្វះទឹកស្រោចស្រពបានជាង ៣០០ហិកតា។

ជាមួយនឹងការផ្តល់ជូនអណ្តូងទឹកនេះ នៅព្រឹកថ្ងៃទី១៩ ខែកុម្ភៈ ឆ្នាំ២០២៥ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំមន្រ្តីជំនាញ ចុះពិនិត្យការបូមទឹក ដោយប្រព័ន្ធសូឡាស្រោចស្រពដំណាំស្រូវប្រាំង របស់កសិកររវាងភូមិពន្លៃ ភូមិបុស្សទី និងភូមិត្រពាំងស្ទៀង ស្ថិតក្នុងភូមិសាស្រ្តឃុំកក់ ស្រុកពញាក្រែក ដោយមានការចូលរួមពីលោកមេឃុំ មន្ត្រីកសិកម្មឃុំ និងប្រជាកសិករផងដែរ។

ក្នុងឱកាសនោះ លោក ហេង ពិសិដ្ឋ ប្រធានមន្ទីរ បានលើកឡើងថា ដោយមានការយកចិត្តទុកខ្ពស់ពីសំណាក់ ឯកឧត្តម ប៉ែន កុសល្យ អភិបាលខេត្តត្បូងឃ្មុំ បានជម្រុញដល់មន្ទីរជំនាញ ព្រមទាំងអាជ្ញាធរមូលដ្ឋាន និងមន្ត្រីជំនាញពាក់ព័ន្ធ ចុះមកពិនិត្យដល់ទីតាំងដីស្រែ ដើម្បីជួយស្វែងរកប្រភពទឹកអន្តរាគមន៍លើបញ្ហាខ្វះខាតទឹក សម្រាប់ធ្វើស្រែ ប្រមាណជាង ៣០០ ហិកតា ពោលគឺមិនត្រូវទុកឱ្យមានការខូចខាត ដោយសារតែយើងមិនបានជួយពួកគាត់ឲ្យអស់លទ្ធភាពនោះឡើយ។ ជាក់ស្តែង អណ្តូងទឹកចំនួន ១២ ដែលក្នុងនោះអណ្តូង ២ ប្រើម៉ូទ័របូមដោយប្រព័ន្ធសូឡា ត្រូវបានផ្តួចផ្តើម និងចូលរួមឧបត្ថម្ភ ពីឯកឧត្តម ប៉ែន កុសល្យ អភិបាលខេត្តត្បូងឃ្មុំ ព្រមទាំងអាជ្ញាធរស្រុក/ឃុំ បានកៀរគរសប្បុរសជន បង្កើតឲ្យមានសមិទ្ធផលទាំងនេះឡើង អាចផ្តល់ទឹកស្រោចស្រពស្រូវស្រែប្រាំង ជួយសង្គ្រោះស្រូវរបស់ពួកគាត់បានទាន់ពេលវេលា ។

ជាមួយគ្នានេះ លោក ហេង ពិសិដ្ឋ និងក្រុមការងារ ក៏បានលើកទឹកចិត្ត ដល់អាជ្ញាធរ និងប្រជាកសិករ បន្ថែមថា៖
-សូមចងក្រងជាក្រុមកសិករ ដែលមានក្បាលដីស្រែក្បែរគ្នា ៤-៥គ្រួសារ ប្រើប្រាស់សូឡាបូមទឹក ១គ្រឿង ដោយដាក់វេណគ្នាបង្ហូរទឹកបញ្ចូលស្រែតែម្តង ដែលធ្វើឲ្យកសិករម្នាក់ៗចំណាយប្រាក់តិចតែចំណេញច្រើន
-កសិករ ត្រូវសម្រិតសម្រាំងគ្រាប់ពូជស្រូវដោយខ្លួនឯង ដោយរក្សាទុកផ្នែកណាមួយ ដែលគិតថាល្អ ធ្វើការកាត់ពូជលាយ កាត់ស្មៅ ជម្រុះកួរមិនល្អចោល។ កសិករ អាចរក្សាទុកដី ១០អារ សម្រាប់ ព្រួស វិញ លើផ្ទៃដី ១ហិកតា
-ជំរុញការផលិតពូជស្រូវដោយខ្លួនឯង ជាពិសេសពូជក្នុងស្រុក
-ប្រមូលផ្តុំដោយស្ម័គ្រចិត្ត ផ្លាស់ប្តូរមកដាំដុះប្រភេទពូជស្រូវក្រអូបក្នុងស្រុក ដូចជាប្រភេទពូជសែនក្រអូប ០១ ដើម្បីភ្ជាប់ទៅកាន់ទីផ្សារ(រោងម៉ាស៊ីនកិនស្រូវក្នុងខេត្ត) តាមកិច្ចសន្យាផលិតកម្មកសិកម្ម ដើម្បីរក្សាស្ថិរភាពថ្លៃ និងនិរន្តរភាពទីផ្សារ។

ទន្ទឹមនោះ លោក ហេង ពិសិដ្ឋ ក៏បានអំពាវនាវដល់បងប្អូនប្រជាកសិករ សូមកុំធ្វើស្រូវរដូវប្រាំងជាថ្មី ចាប់ពីខែកុម្ភៈ ឬខែមិនា ព្រោះថាវានឹងប្រឈមខ្វះទឹក ស្រោចស្រព ហើយក៏គួរពិចារណាកុំប្រញាប់ចាប់ផ្តើមធ្វើស្រូវរដូវវស្សា ប្រភេទស្រូវកណ្តាល និងស្រូវធ្ងន់ នៅខែមេសា ដោយត្រូវរង់ចាំ ដល់ខែឧសភា ឬខែមិថុនា ដើម្បីចៀសវាងការខូចខាតគ្រាប់ពូជ ដោយសារមិនមានភ្លៀងធ្លាក់គ្រប់គ្រាន់ និងកាត់បន្ថយចំណាយលើការថែទាំផងដែរ៕